Eftirspurn eftir símenntun heldur áfram að aukast
Viðskiptablað Morgunblaðsins
„Á heildina litið hefur eftirspurnin eftir símenntun aukist eftir bankahrun, og það sem hefur komið okkur hvað mest á óvart er að aukningin hefur verið mest hjá einstaklingum sem fjármagna námið úr eigin vasa. Fyrirtækin drógu lítillega saman seglin, og vörðu minni fjármunum til símenntunarmála strax eftir hrun, en þó hefur samdrátturinn þeim megin ekki verið svo mikill og n.v. í samræmi við það sem við áttum von á,“ segir Guðrún Högnadóttir framkvæmdastjóri Opna háskólans í HR. Á síðasta ári sátu um 9.300 manns námskeið við Opna háskólann.
Opni háskólinn í HR býður upp á fjölbreytt úrval lengri og styttri námsbrauta og námskeiða. Meðal námskeiða sem hefjast á næstu dögum og vikum má nefna nám í áhættustýringu, rekstrar- og fjármálanám, og ýmis stjórnunarnámskeið. Einn sterkasti vaxtarsprotinn eru námskeið sem veita fagréttindi eða löggildingu af einhverjum toga. „Við komum t.d. auga á að með mögulegum nýjum siglingaleiðum norður fyrir Ameríku og Asíu gæti Ísland orðið n.k. miðstöð fyrir flutninga, og settum því á laggirnar námsbraut í flutningafræði (e. logistics) og hefur eftirspurnin reynst hreint ótrúleg. Einnig hefur verið mikið sótt í námsbraut sem veitir alþjóðleg starfsréttindi í markþjálfun (e. coaching), og liggur þangað straumur fólks sem hefur góðan grunn úr viðskiptagreinum en langar að bæta nýrri vídd við þekkingarforðann. Sama er með nám sem veitir leyfi til verðbréfamiðlunar, að þangað er mikið sótt og margir sem eru að setja sig í stellingar til að nýta tækifærin sem von er á þegar efnahagsástandið skánar á ný,“ útskýrir Guðrún. „Á heildina litið er tilhneigingin sú að fólk leitar í nám sem nýtist beint í starfi og veitir nánast um leið forskot á vinnumarkaði.“
Þessi mikla áhersla á að námið nýtist vel segir Guðrún að sé breyting frá því sem áður var. „Það er ekki langt síðan fólk leit oft á símenntunarnámskeið sem n.k. frí frá vinnunni, leið til að kúpla sig út úr hversdagsverkefnunum og beita huganum á önnur viðfangefni. Nú hefur þetta breyst, og mjög skýr markmið hjá flestum nemendum að námið skili þeim auknu starfsöryggi, betri þekkingu, getu og færni í starfi eða jafnvel varði leiðina að stöðuhækkun.“
Eins og fyrr sagði þá hafa fyrirtækin dregið lítillega saman seglin í símenntunarmálum. Guðrún segir þetta geta orðið varasama þróun en innlendar og erlendar rannsóknir gefa til kynna verulegan hag af fjárfestingu í þekkingu starfsmanna. Sá hagur kemur m.a. fram í breytum s.s. aukinni framleiðni, gæðum, þjónustu og tekjum fyrir vinnustaði. Virði samfélaga af fjárfestingu í lífstíðarlærdómi birtist t.d. í minna atvinnuleysi, aukinni nýsköpun og aukinni samkeppnishæfni. Hagur einstakilinga birtist m.a. í auknu atvinnuöryggi, starfsframa, tekjum og ánægju auk þess sem rannsóknir sýna fylgni menntunar og líkamlegrar og andlegrar heilsu! Mikilvægt er að halda símenntun gangandi í einhverri mynd, þó umfangið sé haft minna en var á mestu uppgangsskeiðum atvinnulífsins. „Við leggjum okkur fram við að mæta þörfum fyrirtækjanna og getum skipulagt námskeið og vinnustofur sem eru sérsniðin að bæði verkefnum, áskorunum og svo fjárhag hvers fyrirtækis. Það má líka skipuleggja námið þannig að trufli sem minnst daglegan rekstur, og t.d. í boði örnámskeið sem taka aðeins hluta úr degi, og eins námskeið sem stunda má í fjarnámi og jafnvel horfa á fyrirlestrana á upptökum í tölvunni heima.“
